BACAZIONS EN BEZICLETA

Iste pasato berano prenzipiaba en Uesca a rodar as mías bacazions con a bezicleta, as alforchas e a impreszindible guitarra, que biene de pistón ta biachar solo. Fazié 1.626 quilometros por o Pirineu sin minchar ni un sacre de carne, dieta bechetariana 100%, e adormindo en a tienda campaña.

En Uesca, por carreteras secundarias, rodié a polita sierra i Guara dica o Templo Budista i Dag Shang Kagyu en Panillo, an adormié cuatro nueis e conoxié un lugar e una pistonuda chen.

Dimpués continé t’Andorra ta trespasar-la puyando o puerto con gudrón más altero de tot o Pirineu, o Port D’Envalira con 2.408 m. Un día desayuné en España, minché en Andorra e zené en Franzia… Cuasi me fa un esbrunze (jet lag en angles).

Torné ta España por Puigcerdá enta par Olot e trespasando a zona de a Garrotxa ta rematar en un lugar bien majo, a CalaMontgó.

D’astí, rodiando o mar, marché por o parque natural de o Cabo de Creus, que ye a rebutir de calas una dezaga d’atra a cada cual más impresionán e besité Cadaqués, un polito lugar tot blanco do marchaba de bacazions Gaudí.

Continando por a costa rematé en Santie-Marie a l’altaria de Perpiñan e d’astí rodié o Pirineu franzés dica Oloron-Santie Marie puyando sobrebuenos puertos e trobando politos lugars.

M’alcuerdo en espezial de a puyata ta o Col de Jau, porque ixe día desayuné en a placha beyendo rayar l’alba e rematé encheberdito e pasando un frío que pa qué en o camping i Roquefort de Sault, an sólo bi eba que un anglés chubilato que li diziban Tom e que me combidó a un té bien calién. Zenemos chuntos e rematemos a nuei charrando-nos istorias sobrebuenas.

Ta tornar a España puyé o Pirineu por o puerto de a Pierre de Saint Martín dende Arette, una parete de 25 quilometros e 1.400 metros plena de costeras del 11%, 12% e mesmo 15% e unos 10 quilometros con una meya de o 9%. Dimpués baxé por o puerto i Belagua tot fendo una rialleta e por a Bal de o Roncal dica a mesma casa nuestra en Pinsoro.

Ta la chen que nunca no ha feito una ziclotorista li diré que ye una traza prou buena de conoxer lugar e biachar, que no cal estar muito fuerte ta fer-lo, nomás cal tener ganas e bezicleta.